Sot priten reshje të dendura shiu në një pjesë të madhe të vendit. Sipas Institutit të Gjeoshkencave, në qarqet Vlorë dhe Gjirokastër reshjet do të jenë intensive deri lokalisht shumë intensive, ndërsa në qarqet Shkodër, Kukës, Dibër dhe Elbasan priten reshje intensive.
Në pjesën tjetër të vendit reshjet do të jenë mesatare, por lokalisht mund të arrijnë intensitet të lartë. Gjatë reshjeve nuk do të mungojnë edhe shtrëngatat.
Në zonat e Veriut dhe Lindjes, mbi lartësinë 1000 metra mbi nivelin e detit, reshjet do të kalojnë në formë dëbore.
Rreziku nga përmbytjet
Priten reshje me intensitet të lartë, veçanërisht në veri dhe jug. Në qarqet Shkodër, Kukës, Dibër, Elbasan, Vlorë dhe Gjirokastër ekziston mundësia për vërshime të shpejta të lumenjve të vegjël malorë dhe rrëshqitje dherash. Po ashtu, në zonat urbane të këtyre qarqeve mund të shfaqen përmbytje të lokalizuara, varësisht nga gjendja e kanalizimeve.
Reshjet e shumta do të sjellin rritje të prurjeve në lumenjtë e mëdhenj dhe të mesëm si Shkumbini, Semani dhe Vjosa.
Temperaturat
• Bregdeti: 12–13°C
• Vendet e ulëta: 11–12°C
• Zonat malore: 6–8°C
Era
Era do të fryjë me forcë mesatare deri të fortë, sidomos përgjatë vijës bregdetare.
