Inspektorati Kombëtar i Mbrojtjes së Territorit (IKMT) në bashkëpunim me Autoritetin Rrugor Shqiptar (ARRSH) ka nisur një fushatë paralajmërimi ndaj të gjitha ndërtimeve pa leje përgjatë akseve nacionale Korçë–Pogradec dhe Korçë–Bilisht.
Sipas njoftimit zyrtar, çdo ndërtim apo objekt që ndodhet më afër se 6 metra nga rruga kryesore, dhe që nuk disponon certifikatë pronësie apo leje ndërtimi, do të prishen pas datës 31 korrik.
Ky paralajmërim përfshin njësoj si bizneset e vogla apo të mëdha, ashtu edhe banesat private, të cilave u është kërkuar të largojnë muret rrethues ose çdo objekt tjetër që ndodhet brenda distancës së përcaktuar.
Burime pranë institucioneve bëjnë me dije se në të dy akset rrugore preken mbi 100 subjekte tregtare dhe rreth 40 banesa, të cilat nuk përmbushin kriteret ligjore.
Autoritetet kanë lënë afat deri në fund të muajit korrik për të vepruar në mënyrë vullnetare, përndryshe IKMT do të nisë ndërhyrjet me forcë, sipas ligjit në fuqi për ndërtimet pa leje në hapësirat publike dhe rrugët nacionale.
