Papa Françesku: Në Gaza kemi një luftë të dy të papërgjegjshmëve
Papa Françesku e konsideroi situatën në Gaza si një luftë nga dy persona të papërgjegjshëm. Në një intervistë për një television zvicerian ai tha se çdo ditë interesohet për civilët e pafajshëm në Gaza.
“Çdo ditë, në orën 19, telefonoj famullinë katolike në Gaza. Gjashtëqind njerëz jetojnë atje dhe tregojnë atë që shohin: është një luftë”, tha Papa Françesku.
Duke iu referuar situatës në Lindjen e Mesme, Papa shtoi: “Në luftë ka dy palë ndërluftuese, jo një. Të papërgjegjshëm janë ata dy që zihen. Dhe nuk është vetëm lufta ushtarake, por edhe lufta guerile, si të thuash, e Hamasit, një lëvizje që nuk përbëhet nga një ushtri. Kjo është diçka e shëmtuar”.
Ai shtoi se të gjitha luftërat e përjetuara përfundojnë me një marrëveshje, duke bërë kështu thirrje për negociata./vizionplus.tv/
