Publikohen pamjet që vërtetojnë lidhjen e dy shqiptarëve me trafikimin e rreth 2.2 tonëve kokainë, që u sekuestruan nga autoritetet disa ditë më parë në Peru.
Sipas mediave vendase, Franc Malo dhe Gentjan Meta janë dy “ kokat” e trafikut të lëndëve narkotike që vepronin mes Kolumbisë, Ekuadorit dhe Shqipërisë.
“Agjentët e policisë kishin informacione se dy shtetas shqiptarë kishin kaluar kufirin nga Ekuadori për të hyrë në Peru ilegalisht. Ata janë anëtarë të mafies së fuqishme shqiptare dhe kanë mbërritur në territorin peruan për të dërguar tonelata kokainë nga Evropa.” – thuhet në dokumentin e policisë.
Sipas autoriteteve prania e trafikantëve shqiptarë të drogës në Ekuador dhe Kolumbi është rritur shumë në dekadën e fundit. Këto organizata përfitojnë nga eksportet e frutave dhe produkteve të tjera bujqësore në Evropë, për të trafikuar kokainën në sasi të mëdha.
Gjatë operacionit , që u zhvillua me 12 qershor, te quajtur “Bitcoin”, policia gjeti sasinë e madhe të kokainës të fshehur në kanoçe mes asparagëve te konservuar. Në pranga ranë shtatë persona, ndërsa janë ende në kërkim dy të tjerë.
Policia tha se droga do të dërgohej nga porti pranë kryeqytetit Lima, në Roterdam të Holandës.
Ndërkohë policia shqiptare nuk ka bërë asnjë reagim lidhur me këtë operacion të policisë peruane, që shkatërroi grupin shqiptar të narko-trafikut.
