“Pa maska, me fytyrat tona”, protestë në Prishtinë pas dënimit të ish-krerëve të UÇK
Organizata e Veteranëve të Luftës së Ushtrisë Çlirimtare të Kosovës (OVL-UÇK) ka thirrur sot një protestë në Prishtinë, pas aktgjykimit të shpallur ndaj katër ish-krerëve të UÇK-së në Hagë.
Protesta do të mbahet në orën 12:00 në sheshin “Skënderbeu”. Organizatorët kanë deklaruar se tubimi do të jetë paqësor.
Thirrja për protestë u bë një ditë më parë nga Gazmend Syla, përfaqësues i OVL-UÇK-së, pas vendimit të Këshillit Drejtues të organizatës.
“Protesta jonë që organizohet nesër është paqësore, jo e dhunshme, pa maska, me fytyrat tona. Kemi çfarë të tregojmë, fytyrat i kemi të ndershme, s’kemi nevojë fare të vendosim maska në protestë”, deklaroi Syla.
OVL-UÇK ka kundërshtuar aktgjykimin ndaj Hashim Thaçit, Kadri Veselit, Rexhep Selimit dhe Jakup Krasniqit, duke e cilësuar vendimin si të padrejtë.
Sipas Sylës, organizata e sheh vendimin si një përpjekje për të vendosur në të njëjtën peshore luftën e UÇK-së dhe ngjarjet e viteve 1998-1999.
Më 16 shtator, Gjykata e Hagës dënoi me nga 25 vite burg Hashtim Thaçin dhe Jakup Krasniqin, me 18 vite burg Kadri Veselin dhe me 13 vite Rexhep Selimin.
