Lideri i opozitës, Lulzim Basha mblodhi në një takim këtë të enjte mësuesit për të folur për pandeminë dhe situatën në shkolla. Të gjithë mësuesit ju ankuan Bashës se mungojnë kushtet për të përballuar pandeminë dhe se nuk ndihen të vlerësuar.
“As që bëhet fjalë për orarin e ndërmjetëm për dezinfektimin e klasave. Nuk ka mësues zëvendësues, orët shtesë nuk paguhen”, tha mësuesja Irma Marku.
Të tjerët ngritën shqetësimin se arsimtarët janë të detyruar të mbajnë të fshehtë se janë infektuar për të ruajtur vendin e punës.
“Shumë mësues nga frika se nuk kthehen më në arsim e fshehin faktin që po kalojnë COVID-in”, u shpreh Arjan Peraj.
Kurse mësuesja Rudina Alla e ndali theksin tek cilësia e mësimdhënies në kushtet e pandemisë.
“Mësimi po bëhet me mësuesë praktikantë, të pakualifikuar për mësimdhënie. Nxënësit deri në 10 ditë pa mësim fare”, deklaroi ajo.
Në anën tjetër, Lulzim Basha përsëriti kërkesën për testim të vazhdueshëm të mësuesve.
“Mësuesit të testohen vazhdimisht, më të ekspozuarit pas mjekëve dhe infermierëve. Protokolle të qarta të ajrosjes dhe higjienizimit, mbështetjes financiare, mungojnë. Shkollat të higjienizohen, të furnizohen me ujë e dizinfektohen. Brenda 4-vjeçarit tonë të parë rroga minimale e mësuesit 700 euro. Buxheti i arsimit si % ndaj PBB-së do të jetë në nivelet e BE-sës. Asnjë bir apo bijë shqiptari të mos mbetet pa studiuar për shkak të rrethanave ekonomike të familjes.”
