Kryeministri hungarez Viktor Orban deklaron se nuk ka frikë nga humbja në zgjedhjet parlamentare të pranverës 2026.
Në një intervistë për Matthias Döpfner, drejtor ekzekutiv i grupit mediatik gjerman Axel Springer, Orban theksoi se ka përvojën e duhur për t’u përballur me çdo skenar politik.
“Kam kaluar 16 vjet në politikë si udhëheqës i opozitës. Mos kini frikë, unë di si të vazhdoj”, tha ai, duke nënvizuar se nuk shqetësohet për mbijetesën politike.
Orban, i cili ka drejtuar Hungarinë për afro 20 vite – 15 prej tyre radhazi – u shpreh se mban rekord si kryeministër, por edhe si figurë kryesore e opozitës.
Ndërkohë, sondazhet e fundit tregojnë se partia e tij, Fidesz, ndodhet pas formacionit opozitar Tisza, të drejtuar nga Péter Magyar.
Tisza kryeson për shkak të premtimeve për luftën kundër korrupsionit dhe rimëkëmbjen ekonomike, sipas Politico.
Zgjedhjet pritet të zhvillohen në pranverë, me shumë gjasa në muajin prill. Orban, megjithatë, sheh si kundërshtar të vërtetë jo opozitën, por institucionet e Bashkimit Europian.
