Përfaqësues të Aleancës për Mbrojtjen e Teatrit dhe opozita zhvilluan protestën e 39-të para Bashkisë, duke kërkuar dorëheqjen e Erion Veliajt.
Drejtuesi politik i PD-së për Tiranën akuzoi kreun e SPAK-ut, Altin Dumani, se po i jep imunitet kryebashkiakut të Tiranës për çështjen e inceneratorit dhe dosjes së 5 drejtorëve.
“Nuk kishte pse të zhvillohej kjo protestë e 39-të, nëse SPAK dhe kolegu i Erion Veliajt, Altin Dumani, do të vendoste të zbatonte ligjin, sepse kreu i bashkisë nuk do të ishte në zyrë,” tha Këlliçi.
Opozita paralajmëroi se do të vazhdojë të publikojë dokumenta kundër Veliajt.
“Erion Veliaj është shqetësuar, sepse dje është zbuluar me fakte të pakontestueshme se si një punonjës i Ujësjellës-Kanalizimeve të Tiranës, Erald Ismaili, merr para nga kryetari i Bashkisë Tiranë, Erion Veliaj, përmes shoqatës ‘Byla’ dhe kompanive që ka hapur në 2017 dhe 2018, dhe paguan drejtpërdrejt bashkëshorten e kryetarit të Bashkisë Tiranë, Ajola Xoxa,” shtoi ai.
Belind Këlliçi deklaroi se, gjatë protestës së së hënës, një prej pikave që do të bllokohet është sheshi para Bashkisë së Tiranës. /vizionplus.tv
