Sekretarja për Marrëdhëniet me Publikun, Silva Caka ka folur për protestën që do të mbahet nga opozita, në datën 6 dhjetor, kur në Tiranë do të vijnë liderët europianë në kuadër të samitit BE-Ballkani Perëndimor.
Në një intervistë me studion e lajmeve në Vizion Plus me Pranvera Borakaj, Caka tha se qëllimi i opozitës është që liderët e BE të dëgjojnë mesazhet e tyre dhe të kuptojnë situatën që po ndodh në Shqipëri nga qeverisja “Rama”.
Sipas saj, qeverinë e tremb masiviteti, teksa shton se protestat janë pasqyra ku nxjerr qartë se çfarë po ndodh në vendin tonë.
“Nuk do të ishte hera e parë që një protestë zhvillohet larg dyerve dhe dritareve vendit ku ndodhen liderët euriopianë. Duam të dëgjohen mesazhet e opozitës,dhe duam të mos harrohet rezoluta e 19 majit sepse janë rekomandimet e tyre që nuk janë zbatuar nga qeveria e Edi Ramës.
Ne jemi në një vend ku demokracia ka marrë fund. Ende nuk kemi reflektuar për vendimin e Gjykatës Kushtetuese për protestat. Kuvendi ende nuk i ka bërë edhe pse është një mbledhje shumë e thjeshtë. Protestat nuk i interesojnë qeverisë së Ramës. Protestat janë pasqyra se çfarë po ndodh aktualisht në Shqipëri. Masiviteti e tremb shumë”, tha ajo.
Ndërkohë që ministri i Brendshëm Bledi Çuçi dhe drejtori i Policisë Muhamet Rrumbullaku bën të qartë sot se opozita mund ta mbajë protestën e saj në datën 6 dhjetor, por jashtë perimetrit “të kuq”.
Lidhur me këto deklarata, Caka tha: “Kur në krye të ministrisë ke një njeri që mendon se duhet ti marrësh leje dhe në krye të policisë ke një rrumbullak, nuk ka lidhje me një vend normal. Është një e drejtë kushtetuese që cënohet me ligj në një kohë kur ka një prapaskenë. I vetmi qëllim është që delegacioni i BE të dëgjojë të vërtetën lakuriq siç është. Këta mendojnë se kanë të drejtën të na ndalojnë ose lejojnë. Ky është standarti i demokracisë në Shqipëri”.
Caka kërkoi që policia të mos provokojë turmën dhe të bëjë punën ashtu siç duhet.
“Policia duhet të dijë të ruaj integritetin. E rëndësishme është që ata të bëjnë punën e tyre siç duhet dhe të mos provokojnë. Opozita do bëj më pas punën e saj”, tha ajo.
