Opozita e bashkuar do të marrë pjesë në mbledhjen e kësaj të hëne që Këshilli Politik do të mbajë në orën 18.00. Oerd Bylykbashi dhe Petrit Vasili konfirmuan pjesëmarrjen, por nënvizuan edhe disa kushte. Duke akuzuar mazhorancën se me ndryshimet kushtetuese dëmtoi stabilitetin demokratik të vendit, opozita kërkoi zbatim të marrëveshjes së 5 Qershorit.
“Pavarësisht njëanshmërisë suaj dhe shkeljes flagrante te Marrëveshjesse 5 Qershorit dhe 14 Janarit, Opozita e Bashkuar ka treguar dhe rikonfirmon vullnetin e saj për t’i qëndruar dhe respektuar marrëveshjet politike të nënshkruara nga ana jonë.Kjo jo vetëm në respekt të votuesve tanë dhe qytetarëve shqiptarë, por edhe të partnerëve tanë strategjikë që kanë qenë të angazhuar me seriozitet dhe përkushtim, duke filluar me ngritjen e Këshillit Politik dhe gjatë gjithë kohës së funksionimit të tij. Në këtë kuadër, Opozita e Bashkuar i qëndron Marrëveshjes së 5 Qershorit dhe Marrëveshjes së 14 Janarit dhe, pavarësisht provokimeve të herëpashershme që bëhen nga ana e Partisë Socialiste, jemi të palëkundur në vullnetin tonë për respektimin e këtyre marrëveshjeve, si rruga e vetme për mbrojtjen e interesit të qytetarëve dhe pritshmërisë që ato kanë nga Reforma Zgjedhore.”
Opozita kërkoi që çdo diskutim në Këshillin Politik të kryhet duke zbatuar marrëveshjen e dakordësuar nga të gjitha palët.
“Duke shprehur qëndrimin e detajuar bashkëlidhur kësaj shkrese, konfirmojmë se: Vijimi i punës në Këshillin Politik duhet të kryhet në mirëbesim mes palëve, duke respektuar Marrëveshjet politike të nënshkruara më parë, të 14 Janarit dhe 5 Qershorit, si dhe standartet e OSBE/ODIHR dhe Komisionit të Venecias. Nën këtë premisë, konfirmojmë pjesëmarrjen në mbledhjen e radhës, ditën e hënë, ora 18.00.”
