Opozita bllokon Foltoren dhe nuk lejon zhvillimin e seancës, Kuvendi kalon në votimin e projektligjeve
Kuvendi ka kaluar në votimin e projektligjeve, pasi deputetët e opozitës bllokuan foltoren, duke penguar zhvillimin normal të seancës plenare.
Parlamenti u rikthye sot në seancë, pas pezullimit javën e kaluar, në vijim të akteve të dhunës të regjistruara gjatë protestave që nisën në Tiranë nëntë ditë më parë.
Në nisje të seancës, teksa kryetari i Kuvendit, Niko Peleshi, po lexonte rendin e ditës, deputetët e Partisë Demokratike u zhvendosën drejt foltores dhe bllokuan zhvillimin e punimeve.
Ata kthyen karriget përmbys dhe vijonin me thirrjet “Parlament i krimit” dhe “Lironi studentët”.
Nga ana tjetër, mazhoranca deklaroi se axhenda e projektligjeve që lidhen me integrimin europian dhe negociatat me Bashkimin Europian nuk mund të mbetet peng i veprime të elementeve destabilizuese që punojnë kundër Shqipërisë.
