Gjetja më e fundit e Organizatës Botërore të Shëndetësisë është që nëse mbush tri ditë pa asnjë simptomë të koronavirusit, atëherë nuk ke më nevojë për izolim.
Kjo hedh poshtë teorinë se duhet të rezultosh dy herë negativ në tampona të kryer të paktën 24 orë larg njëri-tjetrit për t’i dhënë fund izolimit.
“Udhëzimet e reja të OBSH-së në lidhje me metodën e certifikimit të shërimit shënojnë një ndryshim që mund të ndikojë ndjeshëm në dispozitat e miratuara në fuqi në vendin tonë deri më tani”, thuhet në një letër të dërguar nga ministri italian Roberto Speranza Komitetit Shkencor Teknik.
Prandaj, një studim i thelluar pritet të sqarojë se si dhe nëse protokollet shëndetësore të urgjencës së Covid do të ndryshojnë.
“Kriteret e azhurnuara pasqyrojnë rezultatet e fundit sipas të cilave pacientët, simptomat e të cilëve janë larguar, mund të jenë akoma pozitivë për virusin Sars-CoV2 për shumë javë. Megjithë këtë rezultat pozitiv të testit, ata nuk ka gjasa të jenë infektivë dhe për këtë arsye nuk janë në gjendje ta transmetojnë virusin te një person tjetër”, janë përfundimet e OBSH.
Sipas dokumentit të OBSH, kriteret për nxjerrjen e pacientëve nga izolimi pa pasur nevojë të përsërisin testin janë si më poshtë: për pacientët simptomatikë 10 ditë pas fillimit të simptomave, plus së paku 3 ditë shtesë pa simptoma (përfshirë ethe dhe simptomat e frymëmarrjes). Për raste asimptomatike: 10 ditë pas testit pozitiv për Sars-Cov2.
