Zonat e thella malore të bashkisë Maliq po kalojnë situata të vështira dimri nga reshjet e shumta të dëborës.
Njësitë administrative të Gorës dhe Moglicës kanë problematikat më të mëdha nga izolimi I rrugëve. Të gjitha fshatrat e këtyre njësive administrative janë të bllokuara nga dëbora. Vështirësive të krijuara nga moti u shtohet edhe mungesa e energjisë elektrike në disa fshatra të bashkisë Maliq.
Ndërprerje të zgjatura të energjisë elektrike ka patur në fshatrat Sheqeras, Vreshtas e Podgorie.
Ekipet e OSHEE janë në terren për të riparuar difektet e njëpasnjëshme. Një situatë më e përmirësuar paraqitet në fshatrat e fushës së Korçës, rrugët e të cilave janë të hapura dhe kanë qarkullim me akset kryesore nacionale.
Kryetari I bashkisë Maliq Gëzim Topçiu që ka verifikuar gjendjen në terren, e shikon të nevojshme ndërhyrjen në zonat e Gorës dhe Moglicës për ti nxjerë fshatrat e tyre nga izolimi.
Për këtë, ai u ka bërë thirrje firmave nënkontraktore të pastrimit dhe mirëmbajtjes së rrugëve të jenë më prezente në këto zona për të normalizuar situatën.