Mbrëmjen e 5 qershorit, Marina Orikum u shndërrua në një pikëtakim të rëndësishëm të kulturës, muzikës dhe dialogut mes Shqipërisë dhe Italisë, duke mirëpritur një aktivitet prestigjioz të organizuar nga Konsullata e Përgjithshme e Italisë në Vlorë në kuadër të 80-vjetorit të shpalljes së Republikës Italiane dhe edicionit të pestë të Javës së Kulturës Italiane në Shqipëri.
Në ambientet elegante të marinës, të ftuarit përjetuan një mbrëmje ku arti dhe mikpritja u ndërthurën në mënyrë harmonike. Programi artistik u hap nga performanca e kantautorit dhe instrumentistit të njohur italian Mario Venuti së bashku me bandën e tij, të cilët sollën në skenë energjinë, emocionin dhe tingujt karakteristikë të muzikës italiane.
Repertori përfshiu momente të spikatura nga karriera e tij mbi 30vjeçare, nga sukseset në Sanremo deri te këngët që kanë lënë gjurmë në skenën muzikore italiane. Pas koncertit, mbrëmja vijoi me një gala elegante me të ftuar specialë në një nga destinacionet më të veçanta të bregdetit shqiptar, duke konfirmuar edhe një herë rolin e Marina Orikum si një hapësirë moderne që mirëpret evente kulturore, institucionale dhe sociale.
Ky aktivitet shënoi një tjetër moment të rëndësishëm, duke promovuar vlerat e dialogut ndërkulturor dhe bashkëpunimit mes dy vendeve mike. Përmes artit, muzikës dhe shkëmbimeve kulturore, Italia dhe Shqipëria vijojnë të forcojnë lidhjet e tyre historike dhe njerëzore.
Me infrastrukturën bashkëkohore, pozicionin strategjik dhe atmosferën unike buzë detit, Marina Orikum po konsolidohet gjithnjë e më shumë si një destinacion referues për organizimin e aktiviteteve që bashkojnë kulturën dhe turizmin, duke sjellë përvoja të veçanta për vizitorët dhe komunitetin lokal.
