61 bashkitë në të gjithë vendin do të funksionojnë nën ombrellën e Ministrisë së Financave, lidhur me parashikimin e të ardhurave, si dhe me shpenzimet që do të kryejnë.
Ky është parimi i projektligjit të ri, që pritet të miratojë qeveria, lidhur me financat e vetëqeverisjes vendore. Por pse duhet një ligj i ri?
Sipas ministrisë, ligji i ri rrit disiplinën fiskale, ndërsa parashikon edhe krijimin e një këshilli, i cili do të jetë konsultues për njësitë vendore, lidhur me buxhetimin dhe zbatimin e tij.
Pikërisht kjo strukturë u konsiderua nga ekspertët si një ndërhyrje në kompetencat vendore.
Pas reformës territoriale, u konkludua se bashkitë dhe komunat i detyrohen buxhetit një shumë prej 12 miliard lekësh, nga të cilat vetëm 2.7 prej tyre janë shlyer.
Bashkitë kanë parashikuar një plan masash për zerimin e tyre ndër vite, duke u përqendruar në rritjen e taksave, si dhe në reduktimin e shpenzimeve.
