Një hap drejt paqes në Ukrainë! Dakordësi mes SHBA-së, Kievit dhe Evropës, Witkoff takohet të mërkurën me Putinin
Shtetet e Bashkuara kanë vlerësuar si produktive bisedimet e zhvilluara në Oslo mes presidentit ukrainas Volodymyr Zelensky dhe të dërguarve të presidentit amerikan Donald Trump, Steve Witkoff dhe Jared Kushner, në kuadër të përpjekjeve për t’i dhënë fund luftës në Ukrainë.
Sipas një zyrtari amerikan të cituar nga Agjencia Franceze e Lajmeve (AFP), SHBA-ja, Ukraina dhe Evropa kanë arritur një dakordësi për hapat e ardhshëm drejt një marrëveshjeje paqeje. Megjithatë, mbetet për t’u parë qëndrimi i Moskës ndaj propozimeve të diskutuara.
Vëmendja diplomatike është përqendruar te takimi i pritshëm i Witkoff me presidentin rus Vladimir Putin, ku i dërguari amerikan pritet të përcjellë propozimet e trajtuara me palën ukrainase dhe aleatët evropianë.
Pas bisedimeve në Oslo, presidenti finlandez Alexander Stubb foli për përparim konkret, por paralajmëroi se arritja e rezultateve do të kërkojë durim. Nga ana tjetër, Zelensky dhe aleatët evropianë kanë theksuar se tashmë pritet përgjigjja e Rusisë.
Një nga zhvillimet e rëndësishme të bisedimeve ishte edhe rikthimi i bashkëpunimit në shkëmbimin e informacioneve të inteligjencës mes Uashingtonit dhe Kievit. Zelensky deklaroi se ky mekanizëm po funksionon sërish.
Presidenti ukrainas shprehu gjithashtu shpresën për një zgjidhje lidhur me aksesin në rrjetin satelitor Starlink, të përdorur nga forcat ukrainase gjatë luftës.
Gjatë takimeve u diskutua edhe për garancitë e sigurisë për Ukrainën dhe mundësinë e një armëpushimi që do të përfshinte infrastrukturën energjetike.
Trump i kërkon Kievit marrëveshje, Evropa kërkon rol në negociata
Pavarësisht sinjaleve pozitive nga Oslo, qëndrimet mes palëve mbeten të ndryshme. Trump ka deklaruar se Ukraina duhet të arrijë një marrëveshje për t’i dhënë fund luftës, ndërsa zyrtarët evropianë këmbëngulin se kontinenti duhet të ketë rol aktiv në çdo zgjidhje diplomatike.
Kancelari gjerman Friedrich Merz ka paralajmëruar për mesazhe kontradiktore lidhur me konfliktin dhe ka kërkuar një qasje të përbashkët mes Evropës dhe SHBA-së. Ndërkohë, zëvendëspresidenti amerikan JD Vance ka theksuar se mes Uashingtonit dhe Kievit nuk ekziston një aleancë zyrtare mbrojtëse dhe ka përsëritur kundërshtimin e tij ndaj anëtarësimit të Ukrainës në NATO.
Ndërsa diplomacia vijon, sulmet ruse ndaj Ukrainës nuk janë ndalur. Sipas autoriteteve ukrainase, të paktën 10 persona u vranë të martën nga sulmet me dronë në Kiev.
Takimi i pritshëm mes Witkoff dhe Putinit shihet si një hap i rëndësishëm në vijimësinë e negociatave, por një marrëveshje për përfundimin e luftës mbetet ende e pasigurt.
