Ndërsa zgjedhjet po afrojnë, opozita është angazhuar në takime sa më të shpeshta me njerëzit.
Në një lidhje direkte me edicionin qendror të lajmeve në “Vizion Plus”, ish-deputeti demokrat, Ervin Salianji u shpreh se niveli i korrupsionit është shumë i lartë dhe se borxhi publik ka arritur kulmin.
“Niveli i korrupsionit, galopant dhe i padëgjuar më parë. Sipas Kontrollit të Lartë të Shtetit, janë hedhur 7.2 miliardë euro në këto vite të qeverisjes së Ramës. Flasim për vjedhje të drejtpërdrejta, dëme që i janë bërë buxhetit. Në 8 vite nuk ka pasur rritje rroge dhe pensionesh, ka pasur vetëm rritje taskash dhe probleme për qytetarët shqiptarë; shteti ka arritur në kulmin e borxhit publik.”
I pyetur se çfarë garancish do të japë opozita se nuk do të keqpërdorë pushtetin duke ripërsëritur kontrata të dyshimta koncesionare që shkojnë përkundër interesit publik, Salianji tha:
“Sot është paraqitur nga Lulzim Basha një projekt konkret që do të hetojë jo vetëm ligjshmërinë e kontratave, por do të kontrollohen një më një edhe pasuritë e kompanive që kanë fituar koncesionet; do të kontrollohet në raport me shërbimet. Nuk do do të ketë marrëveshje, siç ka bërë Edi Rama dhe qeveria e tij, një pjesë e kontratave, të cilat kanë kaluar në arbitrazh. Krijimi i agjencise që i kontrollon të gjitha përputhshmëritë e çdo kontrate që do të bëjë qeveria, i jep më shumë mundësi dhe i shërben më shumë drejtësisë për të çuar para përgjegjësisë penale çdokënd që ka abuzuar. Nuk do të ketë më koncesione të këtij lloj, nuk janë koncesione, por para publike që i jepen për të menaxhuar privatit.”
