Me rastin e fillimit të vitit të ri shkollor 2025-2026, Policia e Shtetit ka përcjellë një mesazh për nxënësit, mësuesit dhe prindërit, duke theksuar se siguria në shkolla mbetet një nga prioritetet kryesore.
Drejtori i Përgjithshëm i Policisë së Shtetit, Ilir Proda tha se në bashkëpunim me Ministrinë e Arsimit, oficerët e sigurisë, mësuesit, drejtuesit e shkollave, prindërit dhe qeveritë e nxënësve, Policia do të angazhohet përmes patrullave të përgjithshme, strukturave të Policimit në Komunitet, Policisë Rrugore dhe asaj Kriminale, për të garantuar mjedise të sigurta brenda dhe jashtë shkollave.
Proda: Të dashur nxënës, mësues dhe prindër,
Çdo fillim i vitit të ri shkollor është një emocion i madh për të gjithë, sepse aty ndërtohet e ardhmja e fëmijëve tanë. Për Policinë e Shtetit, siguria në shkolla është dhe mbetet prioriteti ynë kryesor.
Në bashkëpunim me Ministrinë e Arsimit, oficerët e sigurisë në shkolla, mësuesit, drejtuesit e shkollave, prindërit dhe qeveritë e nxënësve, Policia e Shtetit do të jetë pranë jush përmes Patrullave të Përgjithshme, strukturave të Policimit në Komunitet, Policisë Rrugore dhe Policisë Kriminale, për të garantuar mjedise të sigurta brenda dhe rreth shkollave.
Ne besojmë se vetëm së bashku mund t’u japim fëmijëve tanë atë që meritojnë: një vit të qetë, të sigurt dhe të mbushur me dije.
Ftoj të gjithë aktorët që i ngarkon ligji për zbatimin e masave të përcaktuara në Paketën e Sigurisë në Shkolla, që të kontribuojnë në interesin e përbashkët: sigurinë e fëmijëve tanë.
Uroj një vit të mbarë shkollor për të gjithë nxënësit, për fëmijët e punonjësve të Policisë së Shtetit të cilët nuk u shoqëruan sot në shkollë nga prindërit, për shkak të angazhimit në detyrë, dhe në veçanti për fëmijët e dëshmorëve të Policisë.
/vizionplus.tv
