Nga Ervin Sina
Nisi zyrtarisht këtë të enjte rezervimi i biletave për duelin e rëndësishëm Shqipëri-Serbi me datë 7 qershor në Tiranë.
FSHF njoftoi përmes faqes së vet të uebit se çdokush që ka interes për të blere bileta për këtë sfide eleminatore të botërorit duhet të aplikojë përmes platformës ebileta.al, duke ndjekur të njëjtën procedurë si për blerjet e mëparshme online. Federata bëri të ditur se afati i aplikimeve do të zgjasë deri më 30 maj.
Çdokush ka të drejtën për të rezervuar maksimumi deri në katër bileta. Pas mbylljes së aplikimeve do të zhvillohet një përzgjedhje e rastësishme dhe automatike, përmes shortit elektronik dhe fituesit do të njihen në adresën e tyre elektronike nga data 30 maj deri në 2 qershor, për të bërë më pas edhe pagesën.
Të vetmit që e kanë bileten e garantuar janë anëtarët e klubit “Tifozët e Kombëtares”. Ndryshimi i procedurës për pajisjen me bilete u bë për shkak të fluksit të jashtëzakonshëm të kërkesave.
