Ish-deputetja e Partisë Demokratike në Shkodër, Izmira Ulqinaku akuzon kryeministrin Edi Rama dhe ministrin e Brendshëm, Sandër Lleshaj si përgjegjës kryesorë për fuqizimin e krimit dhe mungesën e sigurisë.
Duke marrë shkas nga përplasja me armë mbrëmjen e të mërkurës në pedonalen e Shkodrës dhe shpërthimi me tritol në banesën e ish-basketbollistit të Vllaznisë, Ulqinaku tregon se këto dy ngjarje ngjarje tregojnë se krimi është më i fuqishëm se ligji.
“Qeveria ka dështuar me vendosjen e rendit dhe sigurisë në Shkodër. Të shtënat me armë në mes të qytetit, plagosja e qytetarëve kalimtarë, hedhja në erë e banesave në të njëjtën kohë kur e ashtuquajtura forca e ligjit bën shoën e radhës në qytet, tregon se krimi është më i fuqishëm se ligji.”
Sipas saj, Policia në Shkodër është prej 6 vjetësh në kontrollin e kriminelëve, të cilët “shëtisin në qytet me makina të blinduara, gjuajnë me armë në pedonale nga makinat e blinduara dhe nuk u hyn gjemb në këmbë.”
Ish-deputetja demokrate irritohet me faktin që asnjë prej eksonentëve të Partisë Socialiste nuk reagon për situatën e rrezikshme të krijuar në Shkodër.
“Shkodrës i është prishur qetësia që në 2013-ën, kur kriminelët nisën të lirohen nga burgu një e nga një dhe bandat u fuqizuan përmes kultivimit dhe trafikimit të kanabisit. Për të vulosur bashkëpunimin me krimin, që po terrorizon Shkodrën, në zgjedhjet e vitit 2017, Edi Rama i la krimit në dorë, emërimin e shumicës së deputetëve, kryetarëve të bashkive dhe drejtorëve. Deklaratat e Edi Ramës dhe Sandër Lleshajt se “krimi duhet të dëbohet nga Shkodra me çdo çmim dhe sakrificë” janë vetëm sa për të kaluar radhën dhe për të mbushur minutat propagandistike.”
Për këtë arsye, Ulqinaku nënvizoi se ka ardhur koha që Rama dhe Lleshaj të japin dorëheqjen.
