Ngërçin e krijuar në Këshillin Politik për listat dhe koalicionet, Ervin Salianji e konsideroi një tradhti që kryeministri Edi Rama po bën ndaj ndërkombëtarëve. Në një intervistë për edicionin e lajmeve në “Vizion Plus”, ish-deputeti i PD tha se diplomatët e huaj që gargantuan opozitën se do të nënshkruhej një marrëveshje e drejtë, po gënjehen nga mazhoranca.
“Ky është një proces i garantuar nga ndërkombëtarët dhe përgjegjësia jonë ishte derisa firmosëm marrëveshjen. Këtu nuk ka asnjë tradhti apo mosbesim ndaj opozitës. Garantët ndërkombëtarë po gënjehen rëndshëm nga Edi Rama. Halli i Edi Ramës është të shpërbëjë koalicionet dhe formulën e shpërndarjes së mandateve që të nxjerrë shumë vota të pavlefshme. Ky është dëmtim që i bëhet demokracixsë. Ne do të fitojmë zgjedhjet me çdo mënyrë që Edi Rama do të dojë.”
Në rast se mazhoranca vendos të vazhdojë e vetme me reformën zgjedhore, pa marrë pëlqimin e opozitës, Salianji u shpreh se do të dëmtohet procesi i integrimit në BE.
“Askush nuk do ta dëshironte dhe do të ishte një nga skenarët që dëmton Shqipërinë dhe ecurinë evropiane. Diskutimi është vetëm për koalicionet dhe Edi Rama është zhveshur nga propaganda për lista të hapura sepse i ka mbyllur listat. Listat e hapura do të thotë që qytetarët të zgjedhin dhe rendisin vetë kandidatët dhe jo që renditjen ta bëjë partia politike. Formula e mazhoranvës do të sjellë një produkt edhe më të keq se herët e tjera.”
Lidhur me mënyrën sesi do të garojë opozita e bashkuar në zgjedhje, Salianji tha se ky vendim do të merret në momentin e duhur.
