Pas më shumë se një viti, personat e dënuar do kenë mundësi të ritakohen nga afër me familjarët e tyre. Takimet, sipas ministres së drejtësisë, do të bëhen duke respektuar masat anticovid. Ministrja Etilda Gjonaj njoftoi gjithashtu se në të gjitha burgjet do rifillojnë aktivitetet kulturore, ndërsa do jepen dhe lejet e veçanta për rastet mortore.
ETILDA GJONAJ – MINISTRE E DREJTESISE
“Rifillimin e lejimit të takimeve të të dënuarve me familjarët, me një takim në muaj duke respektuar distancën e sigurisë, kontrollin shëndetësor, ku familjari është i detyruar të paraqesë vërtetimin e vaksinimit, ose dokumentin e testit se nuk është i infektuar me COVID. Për të miturit e dënuar, do të lejohen 4 takime në muaj me të njëjtat kërkesa për familjarët. Po gjithashtu do të vijojnë të ruhet praktika shumë e mirë e krijuar ashtu siç përmenda me komunikimin online me Skype.”
Ministrja foli gjithashtu edhe për fatalitetet e shënuara nga COVID në burgje prej fillimit të pandemisë.
“656 testime janë bërë për të burgosurit që nga fillimi i pandemisë. Nga testimi u evidentuan 204 persona pozitivë dhe 451 negativë dhe janë shënuar për fat të keq dy humbje jete të rasteve me sëmundje bashkë shoqëruese. që nga fillimi i pandemisë në mars 2020, janë kryer gjithsej 1115 testime të stafit, por fatkeqësisht kemi patur humbje të jetëve të 7 punonjësve të forcave policore dhe stafit civil, dhe përfitoj edhe një herë nga rasti për ti dhënë ngushëllimet familjeve të tyre.”
Deklaratat ministrja i bëri në takimin e zhvilluar me Drejtorin e Burgjeve Agim Ismaili ku premtoi rritje pagash për të gjithë punonjësit gjatë vitit 2022.
