Teksa Partia Demokratike ka mbledhur Kryesinë për të miratuar listën e plotë të kandidatëve për lidershipin e PD-së dhe rregulloren e zgjedhjeve, disa prej kundërshtarëve të Lulzim Bashës kanë dorëzuar një listë me kërkesa.
Fatbardh Kadilli, midis të tjerash kërkon që kandidatët të zhvillojnë një debat publik, ndërsa kërkesa e Edith Harxhit është që të rishikohet përbërja e Komisionit Zgjedhor.
Ibsen Elezi ka vetëm një kërkesë dhe ajo është që të shtyhet data e zgjedhjeve. Në çdo dalje publike, kujtojmë që ata kanë deklaruar se kjo nuk është një garë e ndershme, përsa kohë që Lulzim Basha nuk dha dorëheqjen.
Kërkesat plota e kandidatëve për Kryesinë:
FATBARDH KADILLI
I kërkoj Kryesisë së Partisë Demokratike sa vijon:
- Të miratojë sa më parë kandidaturat që kanë kërkuar të jenë në garë;
- Të miratojë modalitetet për mbledhjen e aktiveve te degëve ku kandidatët me kohe te barabarte të paraqesin platformat e tyre dhe të komunikojnë me anëtarësinë;
- Të procedojë me ngrirjen e administratës së PD deri në zgjedhjen e Kryetarit;
- Të pajisjë menjëherë kandidatët me listat e plota të anëtarësisë;
- Të organizojë tre debate televizive, të hapura për publikun dhe median, me pjesëmarrjen e të gjithë kandidatëve, në Tiranë, Shkodër dhe Vlorë.
EDIT HARXHI
- Kryesia e PDSH-së dhe Komisioni Elektoral të vënë në dispozicion të kandidatëve për Kryetarë të PDSH-së, jo më vonë se data 24 maj 2021, listën e plotë të anëtarësisë së PDSH-së.
- Të rishikohet përberja e Komisionit Zgjedhor dhe atyre në nivel dege, duke përfshirë përfaqësues të kandidatëve për Kryetar.
- Të hartohet një axhendë e takimeve të përbashkëta të kandidatëve me anëtarësinë, për të shpalosur platformat politike dhe zhvillimin e debatit.
- Zyra e Organizimit dhe kryesitë e degëve të venë në funksion të kandidatëve për Kryetar të PDSH-së, infrastrukturën dhe burimet administrative për zhvillimin e takimeve të përbashkëta të sipërcituara.
IBSEN ELEZI
- Shtyrjen e datës së zgjedhjeve për Kryetar të Partisë Demokratike të Shqipërisë, caktuar për në datën 13 Qershor 2021.