Barcelona ishte kryefjala e spekulimeve të merkatos për ditën e martë.The Sun kishte një intervistë eskluzive me sulmuesin Neymar, ku braziliani shprehte vlerësimet e tija për kampionatin anglez, por edhe dëshirën që në një të ardhme të luante në Premier League.
“Më pëlqen stili i futbollit që kanë skuadrat angleze. Pse jo! Ndoshta një ditë do të luaj dhe unë në Premier”, tha Neymar, i cili vazhdimisht ka qenë objektiv i merkatos së klubeve të mëdha të ishullit, ku spikasin dy klubet nga Manchesteri. Por braziliani, i cili ishte protagonist absolut në përmbysjen 6-1 ndaj PSG, ka thënë më tej se fakti që në Angli drejtojnë dy prej trajnerëve më të suksesshëm në Botë sikurse Mourinho apo Guardiola, e bëjnë Premier League-ën, më joshëse për lojtarët anë e mbanë globit.
Por ndërsa kjo intervistë zinte vend në The Sun, në Spanjë spekulimet për një “reformë” në sulmin e Barcelonës përmendën emrat e Antoine Griezmann dhe Paulo Dybalas si lojtarët kyc të merkatos së ardhshme. Që të dy janë cituar së fundmi teksa flasin me superlativa për klubin katalan, ndërsa argjentinasi thuhet se i ka bërë me dije klubit të tij se do jetë gati për t’u larguar menjëherë nga Torino nëse ofertat vijnë nga Barcelona ose Reali i Madridit. Mundo Deportivo e krahasonte 23-vjecarin Dybala me Lionel Messin.
Këtë sezon ai ka shënuar 14 gola dhe 7 asiste duke qenë një nga elementët kyç në formacionin e Allegrit. Buxheti që spekulohet se do të shpenzohet nga Barcelona është plot 200 milionë euro për të dy.
