Kryeministri izraelit Benjamin Netanyahu është zotuar të vazhdojë luftën kundër Hamasit në mes të dënimit ndërkombëtar të një sulmi ajror që vrau shumë palestinezë në Rafah të dielën.
Të paktën 45 njerëz u vranë, sipas ministrisë së Shëndetësisë të drejtuar nga Hamasi, ndërsa qindra të tjerë mbetën të plagosur.
Lexo edhe :
Netanyahu tha se sulmi ishte një “fat tragjik”, por shtoi: “Unë nuk kam ndërmend ta përfundoj luftën përpara se të arrihet çdo qëllim”.
Ai tha se ishte jetike që Izraeli të merrte “çdo masë paraprake të mundshme” për të mbrojtur civilët dhe këmbënguli që Forcat e Mbrojtjes së Izraelit (IDF) po “përpiqeshin që të mos dëmtonin ata që nuk janë përfshirë” në konflikt.
Këshilli i Sigurimit i OKB-së do të mbajë një takim urgjent të martën, me kërkesës të Algjerisë, për të diskutuar sulmin në Rafah.
Në një deklaratë të hënën, Sekretari i Përgjithshëm i OKB-së, António Guterres tha se sulmi kishte “vrarë shumë civilë të pafajshëm që kërkonin vetëm strehim nga ky konflikt vdekjeprurës”.
“Nuk ka vend të sigurt në Gaza. Ky tmerr duhet të ndalet,” tha ai.
Netanyahu, i cili po fliste në parlamentin izraelit tha: Ne po hetojmë incidentin dhe do të arrijmë në përfundime sepse kjo është politika jonë.
Organizatat ndërkombëtare janë rreshtuar për të dënuar sulmin, me BE-në që këmbëngul që Izraeli të respektojë një vendim të Gjykatës Ndërkombëtare të Drejtësisë (ICJ) javën e kaluar për të ndaluar sulmet në Rafah. Kryediplomati i bllokut, Josep Borrell, e quajti sulmin e së dielës “të tmerrshëm”.
Pavarësisht vendimit të GJND-së, Izraeli është zotuar të vazhdojë me pushtimin e Rafahut.
Izraeli filloi sulmin e së dielës në Rafah disa orë pas sulmit të parë raketor të Hamasit në Tel Aviv.
Zyrtarët izraelitë kishin kaluar pjesën më të madhe të së hënës duke u përpjekur të zbulojnë se çfarë shkoi keq në Rafah. Izraeli është nën presion për të shpjeguar se si një “goditje precize” duke përdorur municione të specializuara me “koka të reduktuara” rezultoi në një sulm që vrau dhjetëra persona dhe plagosi shumë të tjerë.
Zyrtarët e lartë ushtarakë, përfshirë gjeneralmajor Yifat Tomer Yerushalmi, avokat i përgjithshëm i IDF, kanë premtuar një hetim të plotë dhe pritet një shpjegim më i detajuar./vizionplus.tv
