Netanyahu niset për në Uashington, çfarë pritet nga takim me Trump më 4 shkurt
Kryeministri izraelit Benjamin Netanyahu u përgatit të largohej nga Izraeli të dielën për një takim me presidentin amerikan Donald Trump , duke kërkuar të forcojë lidhjet me Uashingtonin pas tensioneve me administratën e mëparshme të Shtëpisë së Bardhë për luftën në Gaza .
Netanyahu, lideri i parë i huaj që viziton Trumpin që nga inaugurimi i tij muajin e kaluar, largohet me armëpushimin në Gaza që është ende në fuqi dhe negociatat që synojnë një fazë të dytë që pritet të fillojë këtë javë.
Takimi me presidentin Trump do të zhvillohet të martën dhe do të fokusohet në disa tema të rëndësishme, si negociatat aktuale, çështja e lirimit të pengjeve, kërcënimi iranian, mundësia e normalizimit të marrëdhënieve me Arabinë Saudite dhe situata në Siri dhe Liban.
Sipas informacioneve të fundit, zyrtarët izraelitë, të cilët u takuan me Steve Witkoff, dërguarin special të Trumpit për Lindjen e Mesme, kanë kuptuar se presidenti amerikan po mbështet një fazë të dytë të marrëveshjes për pengjet. Ky fazë parashikon lirimin e më shumë pengjeve në këmbim të një armëpushimi të zgjatur dhe lirimit të të burgosurve palestinezë.
Ndërkohë, Hamasi kërkon një ndalim të plotë të luftës si kusht për avancimin e marrëveshjes, por Netanyahu ka theksuar se nuk do ta pranojë një kërkesë të tillë. Disa mundësi të tjera në diskutim përfshijnë zgjatjen e fazës aktuale të armëpushimit, që është tashmë 42 ditë.
Në lidhje me negociatat e pengjeve, një zyrtar izraelit ka pohuar se mund të ketë raunde shtesë të lirimeve të pengjeve në këmbim të një armëpushimi të zgjatur. Megjithatë, ai ka shtuar se, edhe nëse negociatat e fazës ndërmjetëse janë të suksesshme, Hamasi mund të ndërpresë bisedimet pasi lufta nuk do të ndalet, duke i hapur mundësinë Izraelit të rifillojë luftimet.
Një tjetër temë e rëndësishme e takimeve do të jetë Irani. Netanyahu po kërkon mbështetje nga Trump për mundësinë e veprimeve ushtarake kundër objekteve bërthamore të Iranit, përfshirë sigurimin e bombave bunker-buster, të cilat janë të nevojshme për të goditur strukturat fortifikuara të nëntokësore. Megjithatë, Trump ka theksuar se do të vazhdojë përpjekjet diplomatike për të zgjidhur tensionet me Teheranin, edhe pse ka dyshime të thella mbi mundësinë e një zgjidhjeje diplomatike.
Një tjetër çështje kyçe do të jetë normalizimi i marrëdhënieve midis Izraelit dhe Arabisë Saudite, një qëllim që Trump kishte tentuar ta arrinte gjatë mandatit të tij të parë, por që nuk e arriti plotësisht. Arabia Saudite vazhdon të kërkojë një armëpushim të plotë në Gaza dhe një vizion të qartë diplomatik nga Netanyahu, si parakusht për përparimin në bisedimet e normalizimit. Sidoqoftë, këto kërkesa janë aktualisht të papranueshme për Netanyahu-n, siç kanë pohuar zyrtarë izraelitë.
Gjatë vizitës së tij, Netanyahu do të takohet gjithashtu me Sekretarin e Shtetit të SHBA-së, Marco Rubio, Këshilltarin e Sigurisë Kombëtare, Mike Waltz, Sekretarin e Mbrojtjes Pete Hegseth, si dhe me anëtarë të lartë të Senatit dhe Dhomës së Pëfaqësuesve. Takimet do të përqendrohen në forcimin e bashkëpunimit strategjik midis Izraelit dhe SHBA-së, sfidat e sigurisë në rajon dhe politikën e administratës amerikane ndaj Izraelit dhe Lindjes së Mesme.
/vizionplus.tv
