Netanyahu: Bashkëpunim i plotë me Trump për Gazën! Rubio: Irani është burimi më i madh i destabilitetit në rajon

Garancinë se SHBA-ja dhe Izraeli po bashkëpunojnë, e dha si Marco Rubio, i cili po viziton Tel Avivin, ashtu edhe Benjamin Netanyahu, gjatë deklaratave të përbashkëta që bënë, në kuadër të vizitës së Rubios.

Kryeministri izraelit falënderoi Donald Trump për ndihmën e tij në lirimin e djeshëm të tre pengjeve.

Ai gjithashtu paralajmëroi Hamasin se portat e ferrit do të hapeshin nëse të gjithë pengjet nuk liroheshin.

Duke folur për gazetarët, ai njoftoi se shprehu gjithashtu falënderimet e tij për Rubio për mbështetjen e qartë të SHBA për politikën e Izraelit në Gaza.

Netanyahu tha se ai dhe Trump “po punojnë në bashkëpunim të plotë dhe koordinim të plotë”, ndërsa Marco Rubio përsëriti qëndrimin amerikan se Hamasi duhet të eliminohet.

Strategjia e përbashkët

Benjamin Netanyahu foli për një strategji të përbashkët midis Uashingtonit dhe Tel Avivit, ndërsa u zotua se Izraeli do të arrijë qëllimet e tij të luftës, që janë përmbysja e Hamasit, kthimi i të gjithë pengjeve dhe sigurimi që Gaza nuk do të përbëjë kërcënim për Izraelin në të ardhmen.

Ai shton se “mbështetja e palëkundur” e Amerikës do ta ndihmojë Izraelin t’i arrijë më shpejt këto synime.

Çfarë tha ai për Iranin?

Gjithashtu iu referua çështjes së Iranit. Netanyahu tha se Donald Trump është “miku më i madh që Izraeli ka pasur ndonjëherë në Shtëpinë e Bardhë”.

Megjithë shqetësimin fillestar, Netanyahu raportoi se të dy palët kishin një diskutim produktiv për një sërë çështjesh.

“Asnjë nga këto nuk është më i rëndësishëm se Irani”, deklaron Netanyahu.

“Izraeli dhe Amerika qëndrojnë krah për krah në përballjen e kërcënimit iranian. Ne jemi dakord që ajatollahët nuk duhet të lejohen të marrin armë bërthamore. Ne gjithashtu ramë dakord që agresioni i Iranit në rajon duhet të frenohet.”

Me mbështetjen e Trump, thotë Netanyahu, “ne mund dhe do ta përfundojmë punën”.

Ndërsa Rubio tha se Irani është burimi më i madh i destabilitetit në rajon.

Për Libanin

Dy politikanët iu referuan gjithashtu çështjes së Hezbollahut në Liban, ndërsa Netanyahu tha se Izraeli do të bëjë atë që është e nevojshme për të mbështetur armëpushimin.

“Hezbollahu duhet të çarmatoset dhe Izraeli do të preferonte që ushtria libaneze të merrte kontrollin, por askush nuk duhet të dyshojë se Izraeli do të bëjë atë që duhet të bëjë për të ruajtur armëpushimin dhe për të mbrojtur sigurinë tonë,” tha ai, duke shtuar se sulmi i fundit ndaj një kolone të OKB-së në Bejrut nuk ishte inkurajues./vizionplus.tv