Negociatorët e lartë të SHBA-së dhe Ukrainës i kanë bërë thirrje Rusisë të tregojë një “angazhim serioz për paqen afatgjatë”, pasi bisedimet e zhvilluara në Moskë në fillim të javës dështuan të prodhonin përparim.
Apeli u bë nga i dërguari special amerikan, Steve Witkoff, dhe Rustem Umerov, sekretar i Këshillit të Sigurisë Kombëtare të Ukrainës, pas dy ditësh diskutimesh në Florida.
Në deklaratën e përbashkët, ata theksuan se përfundimi i luftës varet nga “gatishmëria” e Rusisë për të ndërmarrë hapa të qartë drejt uljes së tensioneve dhe ndalimit të viktimave.
Negociatat, në të cilat po merr pjesë edhe Jared Kushner, dhëndri i Presidentit të SHBA-së, Donald Trump, pritet të vijojnë edhe të shtunën, në raundin e gjashtë të diskutimeve brenda vetëm dy javësh.
Delegacioni ukrainas u informua në Florida mbi takimin e Witkoff me presidentin rus Vladimir Putin, që zgjati gati pesë orë. Kremlini deklaroi më pas se “nuk u arrit asnjë kompromis” mbi draftin e planit të paqes të hartuar nga SHBA, por shtoi se Putin mbetet i gatshëm të takohet “sa herë të jetë e nevojshme”.
Presidenti ukrainas Volodymyr Zelensky kërkoi të marrë informacion të plotë mbi atë që është diskutuar në Moskë, duke akuzuar Putinin se po shpik “pretekste të reja për të zvarritur luftën”.
Kievi ka kërkuar rishikime të thella të planit amerikan të paqes, pasi versione të mëparshme janë kritikuar si të favorshme për Moskën. Mospajtimet kryesore midis palëve lidhen me garancitë e sigurisë për Ukrainën pas luftës dhe çështjen e territorit. Rusia kontrollon aktualisht rreth një të pestën e Ukrainës, përfshirë pjesë të Donbasit.
/vizionplus.tv
