Gjermania këmbëngul së përshpejtimi i zgjerimit të Bashkimin Evropian, e konkretisht mbajtja e Konferencës së Parë Ndërqeveritare me Shqipërinë dhe Maqedoninë e Veriut, mbetet prioritet për unionin.
Ministrja e Jashtme gjermane, Annalena Baerbock, deklaroi se Brukseli duhet të mbajë premtimin.
ANNALENA BAERBOCK
MINISTRJA E JASHTME GJERMANE
“Vende si Ukraina, dhe jo vetëm, e kanë parë prej kohësh të ardhmen e tyre në bashkimin evropian. Ne nuk do t’i zhgënjejmë këto vende, do të mbajmë premtimin tonë për anëtarësim në bllok. Kjo vlen edhe për vendet e Ballkanin Perëndimor, veçanërisht Shqipërinë dhe Maqedoninë e Veriut, madje kjo është arsyeja pse tani në gjysmën e parë të vitit ne duhet të fillojmë bisedimet e pranimit me Tiranën dhe Shkupin. Madje jemi vonuar.”
Ministrja gjermane bëri të ditur se ka patur bisedime dypalëshe me ministren e Jashtme bullgare, Teodora Gencovska, me të cilën kishte rënë dakord se deri në qershor duhet të ketë një marrëveshje mes Sofjes dhe Shkupit, për t’i dhënë përfundimisht dritën jeshile Shqipërisë dhe Maqedonisë së Veriut.
Ndërkohë, Baerbock i dha një mesazh të qartë Serbisë, duke nënvizuar se nëse do t’i bashkohet Unionit, duhet të vendosë sanksione ndëshkuese ndaj Moskës.
ANNALENA BAERBOCK
MINISTRJA E JASHTME GJERMANE
“Unë do të doja t’i them Serbisë nëse doni të bëheni anëtare, për të cilën po përpiqeni, është thelbësore të mbështesni politikën e jashtme dhe sanksionet e BE-së për momentin”
Një ditë më parë, ishte kancelari gjerman, Olaf Scholz ai që mbështeti hapjen sa më parë të negociatave të anëtarësimit për Tiranën dhe Shkupin.
