Nedim Bajrami hero i Sassuolos. Fantazisti i kombëtares shqiptarë shënoi golin e fitores 3 me 2 të skuadrës së tij kundër Cremoneses, në një sfidë përmbyllëse të javës së 25 të Serie A.
Dueli i transmetuar në Tring, në fakt ishte i luftuar dhe me mjaft emocione në stadiumin Mapei.
Dy golat e vendasve në pjesën e parë shënuar nga Lorient dhe Fratesi, në minutat 26 dhe 41, dhanë përshtypjen e një trepikëshi të lehtë për Sassuolon.
Mirëpo miqtë nga Cremona të etur për pikët e mbijetesës reaguan fort dhe barazuan falë një dygolëshi të Desers në minutat 62 dhe 83.
Mirëpo, teksa sfida u fut në shtesë, ai që mendoi për t’i dhënë Sassuolos një trepikësh të çmuar, që e fut krejtësisht në një zonë të qetë të klasifikimit, ishte Nedim Bajrami.
Futbollisti kuqezi u fut nga stoli, në minutën e 68 dhe ia doli që të jetë hero në fund, pas një goli shumë të bukur shënuar më të djathtën, asistuar nga Lorient.
Për 24-vjeçarin, ky ishte goli i dytë sezon, pasi gjatë fazës së parë i kishte shënuar një gol fantastik Milanit, përmes një goditje dënimi, kur luante për ngjyrat e Empolit.
