Sot, në orën 12:00 GJKKO pritet të shpallë vendimin lidhur me masën e sigurisë ndaj ish-kryeministrit Sali Berisha.
Avokati i këtij të fundit, Sokol Mëngjesi, ka mbërritur në ambientet e Gjykatës.
Avokati thotë se kanë dorëzuar me postë kërkesën për përjashtimin e gjyqtares Irena Gjoka.
Prokuroria e Posaçme ka marrë autorizim nga Kuvendi për masën e arrestit ndaj ish-kryeministrit Sali Berisha, person nën hetim për çështjen Partizani, nga detyrim paraqitje, që ai nuk e respektoi në arrest shtëpie me mbikëqyrje policore dhe të mos ketë asnjë komunikim me persona të tjerë veç familjarëve në banesë.
Ditën e djeshme, avokatët e Berishës brenda orës 16:00 kur perfundoi orari zyrtar, nuk kishin depozituan kërkesën e radhës për përjashtimin e gjyqtares Irena Gjoka.
Pasditen e djeshme, 29 dhjetor, Sokol Mëngjesi pranoi se u paraqit në Gjykatën e Posaçme për të tërhequr vendimin e arsyetuar të gjyqtares Rudina Palloj, e cila rrëzoi kërkesën e tyre të mëparshme për përjashtimin e Irena Gjokës, pasi e gjeti atë të pabazuar në ligj. Por, sipas tyre ky vendim nuk iu vendos në dispozicion, ndaj ata nuk u paraqitën në gjykatë.
“Gjykata e posaçme të informojë, se cila është arsyeja që deri në orarin zyrtar nuk vuri në dispozicion vendimin e papranueshmerisë së kërkesës për përjashtimin e gjyqtares Irena Gjoka sikurse i’u premtua avokatëve zyrtarisht dhe verbalisht!”, tha avokati Sokol Mëngjesi.
Për të provuar se gjyqtarja është e njëanshme dhe se ka konflikt interesi në vendimmarrjen ndaj Berishës, mbrojtësit thonë se ky vendim do t’i bashkëngjitej materialeve audio dhe vendimeve të mëparshme të vetë gjyqtares Irena Gjoka që ata kërkojnë të përjashtojnë.
Ndërkaq, edhe zyra e shtypit të Gjykatës së Posaçme pranoi se nuk iu ka shkuar asnjë kërkesë me shkrim për përjashtimin e gjyqtares.
Pas 2 muajsh e 8 ditë nga momenti që SPAK ka kërkuar masën e parë, atë të Detyrimit të Paraqitjes për Sali Berishën, numri i kërkesave për përjashtimin e gjyqtares Irena Gjoka ka shkuar në katër.
Sali Berisha është shprehur më herët se në cilësinë e kryetarit të Këshillit të Lartë të Drejtësisë, e ka shkarkuar gjyqtaren në shkurt të 1996 për paaftësi profesionale.Por Irena Gjoka është riemëruar vetëm 6 muaj më vonë që për Prokurorinë e Posaçme është provuar edhe nga Këshilli i Lartë Gjyqësor./vizionplus.tv
