Gjykata e Apelit ka ndryshuar masën e sigurisë për disa prej të arrestuarve pas tërmetit të 26 Nëntorit. Mësohet se trupa gjyqësore ka vendosur që të lirohen nga burgu 15 zyrtarë, duke i lënë në masën e sigurisë “Detyrim paraqitje” ose “Arrest shtëpie”.
Mes atyre që fituan lirinë janë edhe dy ish-kryekomunarët Fatbardh Plaku dhe Besnik Fuçia, për të cilët u vendos masa “Detyrim paraqitje”. E njëjta masë u dha edhe për Faik Fejzon, Hodo Gjonin, Shefqet Dodën, Mehmet Felahin, Agim Eskin, Pëllumb Korfuzin, Gerti Çallikun, Ndoc Pepkolajn, Ali Dyrmishin dhe Luan Betën.
Ndërsa Gëzim Shkalla, Naim Shehi dhe Fejzi Dyrmishi u lanë nën masën e sigurisë “Arrest shtëpie”. Ata u akuzuan për ndërhyrje të paligjshme në pallatet e dëmtuara për shkak të tërmetit të 26 Nëntorit si edhe për shpërdorim detyre dhe u arrestuan gjatë një super-operacioni policor.
