Të paktën 800 kg lëndë narkotike kanabis sativa e cila vinte nga Shqipëria është ndaluar në Foxhia të Italisë.
Gomonia u ndalua pas katër orë ndjekje ku u angazhuan Guardia di Financa e Pulias, një avion i Frontex dhe një helikopter. Operacioni është asistuar edhe nga Policia Shqiptare.
Ja komunikata e plotë e Policisë së Shtetit:
“Në orët e pasdites së djeshme pas sinjalizimit nga Policia Kufitare Shqiptare për një gomone që lëvizte me shpejtësi në drejtim të Italisë, Frontex me një avion portugez të patrullës, Guardia di Finanza e Pulias me një helikopter dhe dy Njësi detare me mbështetjen e Guardua di Finanza në Durrës dhe Vlorë, kanë bërë të mundur bllokimin e një gomoneje 7 m të gjatë me dy motorë nga 150 kuajfuqi në afërsi të Viestes, Foxhia. Pas sinjalizimeve nga Policia Kufitare Shqiptare, avioni i Frontex e intercepton në det dhe Guardia di Finanza e Pulias pas 4 orë ndjekie i kap në Vieste rreth orës 18.30 të mbrëmjes së djeshme. Sekuestrohet lënda narkotike e tipit marjuanë rreth 800 kg e ndarë në 42 pako si dhe gomonia.”
