Në sesionin e parë të takimit të Këshillit të Atlantikut të Veriut, sekretari i përgjithshëm i NATO-s, Jens Stoltenberg ka përsëritur se deri më tani, nuk ka asnjë provë që vërteton tërheqjen e trupave ruse në afërsi të Ukrainës.
Shefi i bllokut ushtarak nënvizoi se paqja dhe stabiliteti në zonën euro-atlantike janë nën kërcënim.
JENS STOLTENBERG
SEKRETAR I PERGJITHSHEM, NATO
“Rusia ka treguar sërish shpërfilljen e saj për parimet që mbështesin sigurinë evropiane dhe ka shtuar kërcënimet për përdorimin e forcës në arritjen e objektivave. Fatkeqësisht, kam frikë se kjo është normalja e re për të cilën duhet të përgatitemi. Aleatët e NATO-s kanë qenë të palodhur në përpjekjet e tyre për të punuar drejt një zgjidhjeje politike dhe diplomatike.”
Ndërkohë, zëdhënësi i departamentit amerikan të shtetit, Ned Price ka deklaruar se Rusia gjendet çdo ditë e më pranë pozicioneve për pushtim.
NED PRICE
ZEDHENES, DASH
“Ditët e fundit kemi parë më shumë forca ruse në kufi, jo më pak. Dhe ata po lëvizin, në mënyrë shqetësuese, në pozicione luftimi. Në të njëjtën kohë, kemi parë gjithashtu zyrtarë rusë dhe media ruse të sajojnë histori të shumta në shtyp, të cilat mund të ngrihen për të shërbyer si pretekst për një pushtim. Mund të përfshijë pretendime për aktivitetin ushtarak ukrainas në Donbas, pretendime të rreme për aktivitete të SHBA-së ose NATO-s në tokë, det ose ajër, madje edhe pretendime për inkursione të Ukrainës ose NATO-s në territorin rus.”
Departamenti amerikan i shtetit nënvizon se Rusia mbështetet në keqinformim për të fshehur gjurmët, dhe kjo është një praktikë e njohur tashmë.
Ndërkohë edhe presidenti i Ukrainës, Volodimir Zelenski ka konfirmuar se trupat ruse nuk janë tërhequr, por vijnë të shtojnë praninë e tyre në afërsi të kufirit.
