Vonesat në procesin e zgjerimit të Bashkimit Evropian kanë rikthyer deklaratat nacionaliste dhe idetë për ndryshimin e kufijve në Ballkanin Perëndimor.
Deklarata është bërë nga presidenti i Sllovenisë, Borut Pahor, i cili pas takimit me homologun Aleksandër Vuçiç, deklaroi se Brukseli duhet të mbajë premtimet.
BORUT PAHOR
PRESIDENT I SLLOVENISE
“Jam i shqetësuar për disa procese në Ballkanin Perëndimor, sot edhe më shumë për shkak të disa deklaratave që mund të dëgjojmë dhe mendoj se mund t’u përgjigjemi atyre vetëm me një zgjerim të shpejtë dhe të suksesshëm të Bashkimit Evropian. Reagimi jonë ndaj rritjes së nacionalizmit dhe idesë së ndryshimit të kufijve në Ballkanin Perëndimor është përkushtimi për të bërë më të mirën. Është çështje paqeje dhe sigurie, këto mund të jenë procese të pakthyeshme, ndaj duhet të jemi të kujdesshëm”
Presidenti i Sllovenisë ka mbështetur edhe nismën “Ballkani i hapur”.
“Unë e mbështes nismën “Ballkani i Hapur” pasi është e qartë se kjo nuk është një alternativë ndaj zgjerimit të BE-së në Ballkanin Perëndimor, por është një proces paralel që eliminon disa probleme dypalëshe që mund të kërcënojnë paqen dhe sigurinë në rajon.”
Gjatë konferencës për shtyp, Vuçiç ka theksuar se përfitimet e kësaj nisme janë shumë të mëdha dhe se të gjithë rajoni duhet t’i bashkohen.
ALEKSANDER VUÇIÇ
PRESIDENT I SERBISE
“Unë e informova Pahorin për elementët e nismës “Ballkani i Hapur” dhe pasojat e mira që kjo nismë sjell për vendet pjesëmarrëse, me shpresën që vendet e tjera të rajonit ta kuptojnë se sa shumë përfitime do të kenë edhe nëse bëhen pjesë. Kemi biseduar edhe për situatën në Kosovë dhe Metohi, marrëdhëniet tona, dialogun në Bruksel dhe problemet me të cilat ballafaqohemi në përpjekjen për të ruajtur paqen e stabilitetin.”
Ndërkohë këtë të hënë, Pahor ndodhet në Prishtinë, ku do të takohet me krerët e shtetit e të politikës.
