Deputeti Myslim Murrizi e konsideroi aktin normativ “Anti KÇK” një propagandë, ndërsa shprehet se në Shqipëri ka vrasje çdo ditë.
Në fjalën e mbajtur këtë të enjte në Parlament, Murrizi theksoi se operacioni “Forca e Ligjit” nuk ka dhënë asnjë efekt.
“Vazhdoni të bëni propagandë, sikur jeni ju të mirët dhe ata të tjerët janë të këqijtë dhe duan të mbrojnë kriminelët. Kjo është propagandë e juaja, kur ju premtuar shqiptarëve parajsën. Nuk e di se si ju shkrep se tani na qenka ngritur krimi në këmbë. Ju bëni gjasme namin, por ju iu vranë 2 në Durrës dje, ju vriten njerëz ne Tiranë, në Durrës, në Vlorë etj. Po iu vriten përditë. Keni pajisur në këtë vend me mjete luksoze lloj lloj halabaku. Nuk e di cfarë pune bën OFL-ja?”
Mes të tjerash, ai solli rastin e presidentit Ilir Meta, për të cilin tha se dje u votua nga mazhoranca dhe sot shpallet “armik i popullit”. Po ashtu, Murrizi kërkoi që reforma në drejtësi të mos varet nga politika, me argumentin se kryeprokurori merr urdhra nga ministri i Brendshëm.
“Si mundet që prokurori i Përgjithshëm merr urdhëra nga ministri? Ne presim peshqit e mëdhenj, e ju merrini me cironka. Ku janë peshqit e mëdhenj? Këta të dosjeve. Jo, i keni këtu peshqit e mëdhenj. Cdo gjë buron nga këtu. Këtu jepen tendera, këtu bëhet gjithçka. Këtu ka nxjerrë ai burri që i keni nxjerrë fotot. Ne nuk jemi në xhepin e maxhorancës. Unë nuk mund të votoj që Prokurori i Përgjithshëm etj të jetë nën varësi të ministrit të Brendshëm. Ne duam reformë në drejtësi të pavarur nga politika. Ky ligj bie ndesh edhe me ligjin tuaj për amnisti fiskale.”