Një mori akuzash të ndërsjellta ka shpërthyer gjatë 24 orëve të fundit mes Rusisë dhe Gjermanisë, pas publikimit të audiopërgjimit, ku dëgjohen bisedat që dyshohet se janë zhvilluar midis oficerëve ushtarakë gjermanë për dërgesat e armëve në Ukrainë.
Ambasadori i Gjermanisë në Rusi u thirr në Ministrinë e Jashtme ruse, njoftoi agjencia ruse e lajmeve TASS duke cituar një burim të paidentifikuar.
Alexander Graf Lambsdorff mbërriti mëngjesin e sotëm në Ministrinë e Jashtme ruse, pa komentuar para gazetarëve. Kremlini thuhet se i ka kërkuar një shpjegim bazuar në përmbajtjen e përgjimit.
Nga ana tjetër, ministri gjerman i Mbrojtjes, Boris Pistorius akuzoi Rusinë për një “luftë informacioni” që synon të përçajë vendin e tij, në reagimin e tij të parë ndaj publikimit në Rusi të një bisede të regjistruar midis oficerëve të lartë gjermanë.
Mediat ruse publikuan javën e kaluar një regjistrim të një bisede telefonike mes oficerëve të lartë gjermanë, në të cilën dëgjohen të diskutojnë për furnizimet me armë në Ukrainë dhe një sulm të mundshëm të Kievit në një urë në Krime.
Kremlini dënoi “ndërhyrjen e drejtpërdrejtë” të Perëndimit në Ukrainë pasi mediat ruse publikuan ato që dukej të ishin biseda midis oficerëve gjermanë për dërgesat e armëve në Ukrainë.
Qeveria në Berlin konfirmoi se ky regjistrim është autentik dhe se është “vjedhur”, duke deklaruar se është duke e hetuar këtë çështje./vizionplus.tv/
