Kjo javë pritet të jetë vendimtare si për Monacon ashtu edhe për Manchester City-in. Klubi nga principata kërkon të përmbysë rezultatin 5-3 të sfidës së parë në Champions League dhe ka shansin ta provojë këtë të mërkurën. Skuadra e Leonardo Jardim po gëzon formën më të mirë në Evropë, për sa i përket realizimit të golave. Në fundjavë ata fituan 2-1 ndaj Bordeaux, duke e cuar në 84 totalin e realizimeve në Ligue 1 një total i pa-arritshëm edhe për klube si Reali i Madridit apo Barcelona.
Mbappe, Moutinho, Bernardo Silva dhe Falcao janë elementët më të cmuar për Monacon që duke kryesuar kampionatin shpreson fort që të bëjë një rritje të nivelit edhe në arenën Evropiane. Optimizmi është i lartë. Këtë gjë e japin statistikat. Te Monaco nuk kanë varësi golashënuesi, pasi ata gëzojnë faktin se kanë 7 lojtarë që kanë shënuar më shumë se 7 gola, me një mesatare prej 9 golash për lojtarë. Sidoqoftë testi është i vështirë.
Në anën tjetër Pep Guardiola deklaroi në fundjavë se do të ishte një dështim për të nëse nuk arrinte t’i jepte City-it një trofe. Në fitoren 2-0 përballë Middlesbrough-t në Kupën e Federatës, City pa sërish të shënonte Agueron. Për të ky ishte goli i 6-të në 5 sfidat e fundit. Por përtej faktit se përballë ka Monacon në Champions League, kalendari i vë përballë edhe Liverpool-in në kampionat.
Të kuqtë janë rivali kryesor për vendin e tretë dhe ky kalendar me këto dy sfida të rendësishme për City-in mund të vendosë ecurinë e sezonit.
