Zyrtarja e lartë e Bashkimit Europian, Federika Mogerini, është shprehur se ekziston një shans i vërtetë për arritjen e një marrëveshje gjithëpërfshirëse dhe të detyrueshme ligjore për normalizimin e marrëdhënieve mes Kosovës dhe Serbisë në muajt e ardhshëm.
“Unë besoj se ekziston një shans i vërtetë që Aleksandar Vuçiç dhe Hashim Thaçi mund të arrijnë marrëveshje për të gjitha çështjet e hapura ndërmjet Beogradit dhe Prishtinës, një marrëveshje gjithëpërfshirëse dhe ligjore për normalizimin e marrëdhënieve midis dy palëve, një marrëveshje që është plotësisht në përputhje me të drejtën ndërkombëtare dhe që mund të kontribuojë në stabilizimin e të gjithë rajonit.”
Shefja e diplomacisë së unionit, njëherësh ndërmjetësuese e dialogut Kosovë – Serbi, shtoi se tashmë është koha të përfundojë konflikti shumëvjeçar.
“Vitin e ardhshëm, 2019, 20 vjet pas luftës në Kosovë, besoj se është koha ta përfundojmë më në fund konfliktin. Pra, besoj se ne duhet të bëjmë gjithçka që mundemi së bashku me partnerët tanë në Evropë, rajon dhe në skenën ndërkombëtare, duke filluar me Këshillin e Sigurimit të OKB-së, për të mbështetur negociatat përmes dialogut dhe brenda bashkësisë ndërkombëtare.”
Ky është viti, këto vendime duhet të merren tani, ka thënë Mogherini përpara ambasadorëve të Bashkimit Europian në Bruksel.
