Ndërsa numri i grave që përballen me kancerin e gjirit po rritet çdo vit e më shumë, diagnostikimi nëpërmjet protokolleve të rregullta mjekësore është mënyra më e sigurt për të zbuluar sëmundjen në faza të hershme. Mamografia mbetet ekzaminimi kryesor për gratë e moshës mbi 40 vjeç dhe gjatë muajit tetor numri i kontrolleve është ndjeshëm më i lartë. Vetëm pranë Poliklinikës Qendrore në Tiranë kryhen rreth 70 mamografi në ditë.
“Tetori ka numrin më të madh të pacientëve që vijnë dhe bëjnë depistimin, pra kontrollin për kancerin e gjirit. Numri është shumë herë më i lartë në raport me muajt e tjerë. Brenda një dite ne realizojmë 60 apo 70 mamografi. Vijnë kur kanë diçka, por edhe për kontrolle rutinë. Procesi i ekzaminimit kryhet për 10-15 minuta, nuk është i dhimbshëm me aparaturat e reja që kemi. Si protokoll ekzaminues është 1 ose 2 vite”, shprehet Guliem Paloka, imazherist.
Edhe pse ndërgjegjësimi për kryerjen e mamografive është rritur vitet e fundit, sërish gjatë muajve të tjerë të vitit numri i grave që i drejtohen qendrave shëndetësore mbetet i ulët.
“Kemi një ndërgjegjësim më të madh edhe në zonat e thella, rurale, përveç se zonave urbane që ishin skeptike apo në siklet, dhe ndërgjegjësimi i zonave rurale është më i lartë vitet e fundit. Numri i pacientëve që vijnë është shumë i ulët, vetëm kur kemi një indikacion klinik, ato janë rastet që vijnë të konsultohen. Por nuk duhet të harrojmë që kanceri i gjirit nuk jep shenja ose jep vetëm në një fazë të avancuar, prandaj është e rëndësishme që të diagnostikohet dhe të kapet shpejt në kohë.”
Por kanceri i gjirit prek edhe meshkujt, ku vetëm gjatë vitit 2024 u regjistruan 14 raste të reja. Imazheristi Guliem Paloka thotë se mënyra e ekzaminimit është e njëjtë.
“Ekzaminimi i kancerit të gjirit tek meshkujt është i njëjtë si tek femrat, protokollet ekzaminuese janë eko, mame dhe mamografi. Kemi pasur raste, i është evidentuar një formacion dhe i është drejtuar protokolleve nga mjeku i familjes apo onkologu, pastaj është dhënë për të bërë ekzaminim.”
Shërbimi i kryerjes së mamografisë ofrohet falas gjatë gjithë vitit në 16 poliklinika dhe spitalet në të gjithë vendin, si dhe në 2 njësitë e lëvizshme të mamografisë.
/vizionplus.tv
