Mëngjesin e sotëm aksi rrugor kombëtar Korçë – Maliq është përfshirë nga mjegull e dendur, duke vështirësuar ndjeshëm qarkullimin e automjeteve. Më e dendur mjegulla është shënuar në afërsi të fshatrave Libonik, Vlocisht dhe Bulgarec, si edhe përgjatë aksit që lidh Korçën me Pogradecin.
Në këto kushte atmosferike, drejtuesit e automjeteve janë detyruar të lëvizin me shpejtësi të reduktuar, pasi shikueshmëria ka qenë e kufizuar, duke shtuar rrezikun e aksidenteve.
Policia Rrugore ka bërë thirrje për kujdes të shtuar gjatë qarkullimit, veçanërisht në segmentin Qafë-Thanë dhe në rrugën e re Qukës – Qafë Pllocë, ku gjithashtu është raportuar prani mjegulle. Këto janë zona me kthesa të shumta dhe me dukshmëri të reduktuar, çka kërkon vëmendje maksimale nga drejtuesit e mjeteve.
Uniformat blu bëjnë me dije se janë në monitorim të vazhdueshëm të gjithë aksit rrugor, me qëllim parandalimin e ngjarjeve rrugore dhe sigurimin e lëvizjes normale të mjeteve.
/vizionplus.tv
