Këshilli Bashkiak i Tiranës miratoi sot vendimin për dhënien e bursave për nxënësit e arsimit parauniversitar për vitin shkollor 2024–2025.
“Për sa përket solidaritetit dhe bursave, është në nderin e Bashkisë së Tiranës dhe këtij Këshilli Bashkiak, që jep 2500 bursa ekselentëve, për çunat e gocat me 10-a. Duam ta vijojmë këtë ritëm dhe dua të falenderoj të gjithë nxënësit e shkëlqyer. Të gjithë i kemi njësoj, por ata që bëjnë një përpjekje ekstra të veçantë, janë krenari për qytetin. Jam i vendosur që të vijojmë t’i bëjmë këto pagesa. Ndërkohë, 451 i kemi për arsimin profesional publik. Kjo do të thotë, kryesisht për nxënës që vijnë nga Zall Herri, Zall Bastari, pra që nuk e kanë mundësinë të shkojnë e vijnë përditë, por rrinë në konvikte dhe kanë bursë nga Bashkia e Tiranë”, tha Veliaj.
Gjatë diskutimeve në Këshillin Bashkiak për buxhetin e vitit 2025, Erion Veliaj nënvizoi se Tirana sot kas 109 çerdhe e kopshte, si edhe 45 shkolla të reja.
“Përsa i përket infrastrukturës arsimore, ky Këshill Bashkiak duhet të jetë super krenar sepse në këto 9 vite kemi bërë 109 kopshte dhe çerdhe që nuk ishin përpara; pra, o ishin disfunksionale ose nuk ekzistonin fare 109 kopshte dhe çerdhe dhe 45 shkolla”, shtoi kryebashkiaku.
Bashkia e Tiranës u zotua për të ndihmuar nxënësit dhe familjet në nevojë edhe gjatë vitit të ardhshëm, duke lehtësuar barrën financiare dhe duke krijuar një mjedis më të favorshëm për arsimim.
