Këtë të mërkurë, 18 shkurt, Tirana është shndërruar në qendrën e dialogut rajonal për riafirmimin e rëndësisë strategjike të një prej projekteve më të rëndësishme infrastrukturore dhe gjeopolitike të rajonit: Ministerialit të Korridorit VIII, i cili po zhvillohet në Pallatin e Brigadave, me pjesëmarrjen e delegacioneve nga Shqipëria, Maqedonia e Veriut, Bullgaria, Italia dhe Rumania, si dhe përfaqësues nga vende partnere.
Ministri i Jashtëm i Italisë, Antonio Tajani, në fjalën e tij gjatë Ministerialit të Korridorit VIII theksoi qartë dimensionin politik dhe strategjik të kësaj nisme për rajonin dhe për vetë Bashkimin Evropian. Ai e cilësoi Korridorin VIII si një zgjedhje politike për Italinë dhe si një instrument konkret për të mbështetur integrimin evropian të Ballkanit Perëndimor, duke riafirmuar angazhimin e vendit të tij për ta afruar rajonin me familjen evropiane.
“Edhe për Italinë Korridori VIII është një zgjedhje politike. Ne do të bëjmë maksimumin që të jeni pjesë e Bashkimit Evropian dhe jam i qartë për Ballkanin Perëndimor dhe Ukrainën.
Jemi në favor që Ukraina të jetë pjesë e BE, por përpara duhet të plotësojmë një ribashkim, nuk është zgjerim. Ju jeni evropiane. Ne jemi vende evropiane.
Korridori tetë është një nismë politike për të mbështetur integrimin në BE të rajonit. Prania jonë këtu konfirmon angazhimin tonë.
Deklarata që do miratojmë sot do të çoje një mesazh të fuqishëm. Korridori 8 është një përparësi e përbashkët strategjike”, tha ndër të tjera Tajani./vizionplus.tv
