Edhe partitë shqiptare në Maqedoninë e Veriut janë shprehur kundër Shengenit Ballkanik duke deklaruar se vendosja e një marrdhënieje të tillë mes shteteve në Ballkanin Perëndimor nuk ka kuptim pa Kosovën e cila ende nuk njihet si shtet nga fqinji serb.
Bashkimi Demokratik për Integrim vlerëson se nisma nuk do të jetë e suksesshme dhe në këto takime duhet të jenë të pranishëm edhe BE si dhe SHBA. Ndërsa partia në opozitë, Aleanca për Shqiptarët, ka deklaruar se nuk është kundër nismave rajonale por kundërshton çdo të tillë që do të përjashtonte Kosovën.
Edhe Lëvizja Besa në një reagim zyrtar bën të ditur se forma se si po zhvillohet kjo nismë nuk garanton jetëgjatësi.
Por kryeministri Zoran Zaev, i ka bërë thirrje partive politike shqiptare që të argumentojnë më qartë qëndrimet e tyre kundër.
“Aleanca për Shqiptarët, Lëvizja Besa dhe Bashkimi Demokratik për Integrim, të tregojnë se çfarë i shqetëson lidhur me marrëveshjet e ‘Mini-Shengenit’ dhe unë jam gati të them se pse ato janë nënshkruar. Ato duhet të thonë se pse janë kundër, çfarë u pengon? Të tregojnë se a janë ata kundër uljes së taksave, apo kundër kolonave të gjata në vendkalimet doganore … A janë ata kundër heqjes së vizave në tregun e punës në rastet kur një turist ka hyrë tashmë në një prej shteteve anëtare të nismës së ‘Mini-Shengenit’?”.
Në takimin e tretë që u mbajt në Tiranë për shengenin ballkanik, mori pjesë edhe Mali i zi ndërsa Bosnja e hercegovina është ende skeptike.
