Në mesditë, nga selia e Partisë Demokratike, Lulzim Basha i është kundërpërgjigjur rivalit politik Rama duke e bërë përgjegjës për çdo jetë të humbur si pasojë e pandemisë së koronavirusit. Gjatë një komunikimi me gazetarët, Basha ka akuzuar kryeministrin Rama se me rrugëtimin e tij nëpër qytetet e Shqipërisë synon t’i ikë çështjes kryesore që është përballja me pandeminë.
“Përgjegjësi i kësaj situate është zhdukur dhe ka inskenuar bredhje Tiranë-Kukës i shoqëruar nga autokolona mbrojtjeje. Refuzon të japë përgjigje për mosblerjen e tamponëve dhe disbursimin e parave për oligarkët në kohë pandemie”, tha Basha.
Basha ka deklaruar se në 7 vite qeveria Rama ka ndjekur politika raciste ndaj veriut të Shqipërisë e nuk mund t’i mashtrojë qytetarët duke ricikluar të njëjtat premtime.
“Sot në Kukës jetojnë 1/3 e banorëve që kishte qyteti kur Edi Rama erdhi në pushtet. 2/3 e kuksianëve janë detyruar të ikin nga vendi prej diskriminimit që u ka bërë Edi Rama në 7 vite.”
Por sipas kryetarit të PD 25 prilli është momenti që qytetarët do t’i japin përgjigje kësaj qeverie.
“Edi Rama është shkuara, është dështimi është vjedhja, është njeriu që në kulmin e krizës vazhdon të vjedhë, prandaj nuk i ka mbetur asgjë tjetër përveçse të gënjejë.”
Përtej replikave me kryeministrin Rama, Basha i ka bërë sërish apel Spakut që të zbardhë çështjen e inceneratoreve
“Pres përgjigje nga SPAK, që vazhdon të heshtë e përmes heshtjes është bërë fasadë vjedhjes së shqiptarëve.”
Çështja e inceneratoreve është shfrytëzuar nga opozita për të mbështetur akuzën se qeveria injoron problemet e sektorit të shëndetësisë dhe qytetarëve duke favorizuar projekte të cilat sipas PD janë korruptive.
