Milani e mbylli jo me rezultatin që priste kampionatin italian në këtë sezon, pasi nuk shkoi më shumë se barazimi 3 me 3 kundër Salernitanës së vendit të fundit. Megjithatë në San Siro fundi i ndeshjes ishte i gjithi i dedikuar për lamtumirat e trajnerit Pioli dhe lojtarëve veteranë Zhiru dhe Kjer.
Ishte në fakt një atmosferë shumë miqësore, ndryshe nga sa pritej, për trajnerin Pioli më shumë sesa për lojtarët.
Pavarësisht krisjes së tij me tifozët ultras, milanistët nuk i rezervuan duartrokitjet e merituara teknikut që fitoi titullin kampion në vitin 2022 me Milanin e që largohet nga klubi pas pesë vitesh.
Pioli do të kishte dashur në fakt ta mbyllte me një fitore e ashtu sikurse shkoi ndeshja u duk sikur kuqezinjtë do t’ia jepnin këtë kënaqësi trajnerit të tyre, pasi në minutën e 87 Milani ishte në avantazh 3 me 1 falë golave të Leao, Zhiru dhe Kalabria.
Mirëpo në vetëm 2 minuta miqtë me Sambia dhe Simi shënuan dy herë duke e mbyllur takimin në barazim dhe me kuqezinjtë që u renditën të dytët në fund të këtij sezoni.
Juventus ndërkohë u klasifikua i treti, pasi mundi në duelin e fundit Monxen 2 me 0. Për Bardhezinjtë golat u shënuan nga Kieza dhe Aleks Sandro. Zonja e Vjetër tashme pret të zyrtarizojë trajnerin e ri i cili do të jetë Tiago Mota.
