Mesazhi politik që ish-sekretari amerikan i shtetit, Mike Pompeo i dha qeverisë dhe institucioneve të drejtësisë ishte më shumë vullnet për të luftuar korrupsionin. Në 100 vite marrëdhënie Shtetet e Bashkuara të Amerikës Shqipëri, ish-zyrtari i lartë gjatë administratës së presidentit Donald Trump theksoi se pavarësisht se cilës forcë politike i përket, angazhimi i SHBA-ve ndaj vendit tonë mbetet i njëjtë, luftë korrupsionit.
MIKE POMPEO
ISH-SEKRETARI AMERIKAN I SHTETIT
Kjo miqësi do të ketë edhe 100 vite të tjera. Unë kam shërbyer si në opozitë edhe në qeveri, nuk ka rëndësi, thjesht duhet vullnet i mirë nga secili spektër politik për të mbrojtur demokracinë këtu, për të shkulur korrupsionin dhe për të mbrojtur lirinë e popujve tanë dhe të rajonit.
Me të njëjtin mesazh iu drejtua klasës politike edhe ambasadorja amerikane në Tiranë, Yuri Kim, pasi së pari veçoi disa nga bashkëpunimet e vendosura gjatë viteve të fundit, si strehimi i përkohshëm i afganëve apo angazhimi i Shqipërisë në Këshillin e Sigurimit në Kombet e Bashkuara kundër Rusisë.
YURI KIM
AMBASADORE E SHBA NE TIRANE
Jemi duke punuar për të ndërtuar demokracinë dhe për të luftuar korrupsionin. Ka një fill të pakthyeshëm që tejshkon marrëdhëniet mes dy vendeve pavarësisht se kush ulet në Shtëpinë e Bardhë. Për herë të parë në histori ushtria e SHBA ka një prani të saj. Po punojmë për dy projekte energjike që do ta bëjë Shqipërinë një lojtar kyç dhe kjo do të na ndihmojë nga shtypja dhe zhvatja e rusëve. Jemi penëmbajtës në Këshillin e Sigurimit për çështjen më të ngutshme, atë të Ukrainës.
Në kremtimin e 100 vite bashkëpunim diplomatik, mungonin deputetët mbështetës të Komisionit të Rithemelimit. Në emër të Partisë Demokratike, Enkelejd Alibeaj akuzoi ish-kryeministrin Sali Berisha se me mendësinë e tij prej komunisti po rrezikon marrëdhënien mes dy vendeve.
Në takimin me ish-sekretarin amerikan të shtetit, kryeministri Edi Rama bisedoi për projektet amerikane në vendin tonë, pasojat e konfliktit Rusi Ukrainë dhe situatën në rajon si pasojë e tij. Nga Universiteti i Tiranës, Mike Pompeo-s iu dha titulli “Doctor Honoris Causa”.
