Për herë të parë, Presidenti i Republikës Ilir Meta komentoi këtë të premte paketën “Anti-KÇK” të miratuar nga qeveria për të goditur krimin e organizuar. Në një intervistë për “Zërin e Amerikës”, Meta doli kundër ligjit special pasi sipas tij, krimi nuk mund të luftohet me fushata.
“Kjo nuk është një luftë që zhvillohet me fushata, por zhvillohet çdo ditë duke forcuar kulturën e shtetit ligjor dhe ndëshkueshmërisë së të gjithë atyre që rezultojnë të implikuar në këtë fenomene, por dhe në të gjithë strukturat shtetërore në mbrojtje të këtyre fenomeneve. I gjithë legjislacioni ka qenë aty, institucionet kanë qenë aty, askush nuk e pengon qeverinë të ngrejë task-forca, por kur bëhen ndryshime në legjislacion duhet të jenë të mirëmenduara, transparemnte dhe të besueshme dhe të mos krijojnë kontestime dhe mbivendosje të karakterit ligjor dhe institucional sepse në një plan afatgjatë këto nuk i shërbejnë forcimit të sundimit të ligjit.”
Edhe opozita e ka kundërshtuar këtë paketë, duke e quajtur atë një tentativë të kryeministrit Edi Rama për të shpëtuar nga drejtësia e re. Ndërsa ndërkombëtarët kanë mbështetur qeverinë në këtë nismë dhe kanë kërkuar që Operacioni “Forca e Ligjit” të veprojë nën varësinë e SPAK.
