Meta në shkollën e Rozhajës: Nga sot do jem pranë këtyre fëmijëve
Presidenti i Republikës, Ilir Meta ka vizituar këtë të dielë shkollën 9-vjeçare në gjuhën shqipe në fshatin Dacaj në Komunën Rozhajë në Malin e Zi, të banuar nga shqiptarë.
Në këtë vizitë kreu i shtetit është pritur nga stafi pedagogjik i shkollës si dhe dhjetëra nxënës e prindër të tyre.
Ndërkohë kjo është vizita e parë e një Presidenti nga Shqipëria viziton këtë shkollë fillore.
Në fjalën e tij ai është shprehur i lumtur që ndodhet sot pranë brezit më të ri të shqiptarëve në Mal të Zi. Kreu i Shtetit ka dhuruar për shkollën fillore në Dacaj 40 fotografi të përfaqësuesve më të ndritur të Rilindjes sonë Kombëtare si edhe fotografinë e Heroit tonë Kombëtar, Gjergj Kastrioti Skënderbeu.
“Çdo ditë do jem shpirtërisht pranë këtyre fëmijëve të mrekullueshëm. Falenderoj stafin pedagogjik për punën e mrekullueshme që bën në ruajtjen e gjuhës shqipe dhe identitetit kombëtar”.
