Meta në samitin e Brdo-Brijunit: Anëtarësimi në BE, qëllimi strategjik kombëtar

Presidenti Ilir Meta ka theksuar në takimin e 10-të të Udhëheqësve të Procesit të Brdo-Brijunit se anëtarësimi në Bashkimin Europian vazhdon të jetë përparësia më e madhe e Shqipërisë.

Përmes një postimi në “Facebook”, kreu i shtetit shkruan se mbështetja e procesit të Brdo-Brijunit për ambiciet e Shqipërisë për të filluar sa më shpejt të jetë e mundur negociatat, është një mesazh i fortë për të ardhmen strategjike europiane të këtij rajoni.

“Anëtarësimi në Bashkimin Europian vazhdon të jetë përparësia më e lartë e Shqipërisë dhe qëllimi ynë strategjik kombëtar. Kushtëzimi i vendosur nga BE është një provë e rëndësishme për funksionimin e institucioneve demokratike dhe sundimin e ligjit. Mbështetja e Procesit të Brdo-Brijunit për ambiciet e Shqipërisë për të filluar sa më shpejt të jetë e mundur negociatat, është një mesazh i fortë për të ardhmen strategjike dhe të pakthyeshme europiane të këtij rajoni.”

Në këtë aktivitet ishin të pranishëm edhe krerët e shteteve të Kosovës, Kroacisë, Malit të Zi, Bosnje dhe Hercegovinës, Maqedonisë së Veriut dhe Serbisë.